Cuimsiú agus rathúnas

 trí oiliúint, rannpháirtíocht agus forbairt gnó

Chomh maith le hindéantacht an téimh dhírigh agus an fhuaraithe dhírigh a léiriú trí fhuinneamh geoiteirmeach ag a láithreáin taispeána, forbróidh GEMINI acmhainní eile chun tacú le cur chun feidhme agus glacadh fadtéarmach na hacmhainne in-athnuaite sin. Trí aschuir ó na láithreáin agus sonraí bailithe eile a thabhairt le chéile, cumasóidh an tionscadal le hearnáil fuinnimh gheoiteirmigh láidir, inbhuanaithe ar oileán na hÉireann, agus tacóidh sé léi. 

Ní mór an iliomad gnéithe a fhorbairt. Áirítear leo uirlisí agus táirgí a dearadh go cúramach chun tacú le rannpháirtíocht le páirtithe leasmhara in earnálacha amhail oideachas agus oiliúint, gnó, pleanáil, lucht déanta beartas agus rialtas, chomh maith le grúpaí pobail agus an pobal i gcoitinne. 

1.    Cúrsaí oideachais, oiliúna agus scileanna ar fud an oileáin 

• Nascfaidh ábhair oideachais do mhúinteoirí saineolaithe fuinnimh gheoiteirmigh agus geo-eolaíochta le scoileanna, ag tógáil ar chomhpháirtíochtaí atá ann cheana idir comhpháirtithe suirbhé gheolaíoch GEMINI agus múinteoirí meánscoile. 

• Déanfar modúil teagaisc 3ú agus an 4ú leibhéal a fhorbairt le comhpháirtithe acadúla GEMINI UCD, DIAS, UU, QUB, TUD agus ATU. Comhtháthófar leo sin modúil, a bhaineann go sonrach le fuinneamh geoiteirmeach, sa gheo-eolaíocht ábhartha, san fhuinneamh, i ndearadh córais fuinnimh, san innealtóireacht agus i ndearadh córais, agus i gcúrsaí inbhuanaitheachta.

• Creat le haghaidh cúrsaí scileanna agus oiliúna ar (i) leibhéal printíseachta agus (ii) leibhéal forbartha gairmiúla leanúnaí (forbairt ghairmiúil leanúnach). Faoi stiúir ATU, tacóidh sé sin leis na hearnálacha FBM agus gnó agus saineolas agus scileanna foirne á leathnú acu.

2.    Acmhainn taighde a fhorbairt  

Cuirfidh comhpháirtithe suirbhé acadúla agus geolaíochta GEMINI taighde nuálach ar fáil le linn an tionscadail, rud a chuirfidh níos mó le hacmhainneacht ar an oileán i réimsí amhail samhaltú geolaíoch, geoifisic, líonraí teasa, hidrigeolaíocht, dearadh córais fuinnimh, samhlacha gnó agus eolaíocht shóisialta. Beidh táirgí an taighde seo fite tríd an raon iomlán aschur GEMINI agus cuirfear ar fáil go poiblí iad ar ardán ar líne GEMINI.

3.    Rannpháirtíocht sa phobal le haghaidh tionscadail gheoiteirmeacha áitiúla

Déanfar staidéar réamh-indéantachta, faoi stiúir Codema, do phobal trasteorann chun measúnú a dhéanamh ar acmhainneacht tionscadal pobail fuinnimh gheoiteirmigh. Chun an measúnú teicniúil a chomhlánú, oibreoidh TASC agus ICBAN le pobail chun imscrúdú a dhéanamh ar na bealaí is éifeachtaí chun tionscadail fuinnimh gheoiteirmigh phobail a chomhdhearadh agus a chomhfhorbairt.    

4.    Tacú leis an earnáil ghnó gheoiteirmigh

Beidh gá le rannpháirtíocht raon leathan gairmithe agus saineolaithe teicniúla chun go mbeidh earnáil gheoiteirmeach faoi bhláth ar fud an oileáin. Déanfaidh QUB taighde chun tuiscint a fháil ar na riachtanais, ar an taithí agus ar na bacainní a d’fhéadfadh a bheith ann do dhearthóirí geoiteirmeacha, do shuiteálaithe agus d’oibreoirí córais. Chun tacú le forbairt na hearnála geoiteirmí, déanfaidh QUB measúnú freisin ar shamhlacha gnó fuinnimh gheoiteirmigh inbhuanaithe don oileán. Is é is aidhm don obair seo na bealaí is oiriúnaí a aimsiú chun tacú le gnólachtaí geoiteirmeacha ar an oileán.  

5.    Measúnú a dhéanamh ar iompraíochtaí, tuairimí agus braistintí maidir le fuinneamh geoiteirmeach  

Féachfaidh an taighde seo, faoi stiúir QUB, ar an gcaoi a mbraitheann agus a dtuigeann pobail na rioscaí a bhaineann le tionscadail fuinnimh gheoiteirmigh. Beidh sé tábhachtach tuiscint a fháil ar an gcaoi a bpróiseálann pobail faisnéis i gcomhthéacs a gcóras creidimh agus a ndearcthaí i leith áite, agus cumarsáid á déanamh faoi thionscadail gheoiteirmeacha amach anseo.

6.    Aistriú eolais le haghaidh beartais, rialála agus rialtais áitiúil

Chun acmhainneacht an fhuinnimh gheoiteirmigh ar an oileán a bhaint amach go hiomlán, beidh an fhianaise, an t-eolas agus na sonraí is fearr ag teastáil ó phleanálaithe agus ó lucht déanta beartas chun na rialacháin agus na treoirlínte pleanála is oiriúnaí a chur i bhfeidhm. Is réimsí nua iad beartas, rialáil, reachtaíocht agus rialacha pleanála don fhuinneamh geoiteirmeach don dá dhlínse sa tionscadal seo. Leis an obair seo, faoi stiúir Shuirbhéireacht Gheolaíochta na hÉireann le tacaíocht ó GSNI agus RML, forbrófar sainuirlisí agus sainoiliúint a chuirfear ar fáil do lucht déanta beartas agus do phleanálaithe ar an leibhéal áitiúil, réigiúnach agus náisiúnta. 

7.    Ardán ar líne chun tacú le forbairt an fhuinnimh gheoiteirmigh

Déanfar an obair a cuireadh i gcrích ag na láithreáin taispeána, agus na torthaí agus na sonraí a bailíodh sna staidéir chomhlántacha ghnó, rialachais agus phobail, a chomhcheangal chun ardáin agus uirlisí praiticiúla agus cothrom le dáta ar líne a sholáthar. Beidh siad seo ar fáil don phobal agus do na páirtithe leasmhara éagsúla a chabhróidh le fuinneamh geoiteirmeach a sheachadadh d'oileán na hÉireann.  

Tá gach comhpháirtí GEMINI rannpháirteach sna gníomhaíochtaí sin, go díreach mar a ndéantar cur síos air thuas, nó go hindíreach trí láithreán taispeána nó trí aschuir taighde. Tá liosta iomlán na gcomhpháirtithe tionscadail ar fáil anseo.