Rannpháirtíocht phobail i gceantar Loch Mac nÉan

Gníomhaíochtaí thionscadal GEMINI ag
Loch Mac nÉan

Snáithe uathúil de thionscadal GEMINI is ea an obair i gceantar trasteorann Loch Mac nÉan. Mar chlár breithniúcháin daonlathais, is é is cuspóir dó rannpháirtíocht mheasúil agus ‘ón mbun aníos’ a éascú maidir le feasacht agus tuiscint áitiúil ar fhuinneamh geoiteirmeach, agus é ag tacú leis na pobail de réir mar a mhúnlaíonn siad an méid a tharlaíonn ina gceantar féin.

Cé gur bhailigh GEMINI faisnéis ar an leibhéal náisiúnta maidir le feasacht agus braistint an fhuinnimh gheoiteirmigh, déanfaidh an obair anseo é sin a bheachtú ar leibhéal níos áitiúla.

Tacaíonn Clár PEACEPLUS le Tionscadal GEMINI, ar clár é atá á bhainistiú ag Comhlacht na gClár Speisialta AE (SEUPB). Cuireann Clár PEACEPLUS an deis chun cinn le haghaidh ‘Clár do shaoránaigh chun feasacht agus tuiscint a mhúscailt maidir leis na buntáistí a bhaineann le réitigh téimh gheoiteirmigh.’ Cuirfidh tionscadal GEMINI é seo i gcrích trí dheis a chruthú do phobail cheantar Loch Mac nÉan tionscnaimh phobail ghaolmhara a scrúdú. Is é seo an t-aon réigiún teorann ar cuireadh an deis seo ar fáil dó agus cuirfidh sé le gníomhaíochtaí rannpháirtíochta pobail roimhe seo sa cheantar.

Beidh na buntáistí a d’fhéadfadh a bheith ag baint leis an bhfuinneamh geoiteirmeach, na rioscaí a bhraitear agus na fíor-rioscaí a bhaineann leis an bhfuinneamh geoiteirmeach, mar chuid den phlé, agus tabharfar soiléiriú ar na céimeanna praiticiúla agus ar na próisis chinnteoireachta a bhaineann le córais fuinnimh gheoiteirmigh a chur in úsáid ar an leibhéal áitiúil agus ar leibhéal an phobail. Agus béim á leagan ar an eolaíocht shóisialta, ní dhéanfar aon obair fhisiciúil amhail druileáil nó obair allamuigh ar an láthair anseo mar chuid de thionscadal GEMINI.

Ó thús 2026, is éard a bheidh i gceist le rannpháirtíocht i limistéar fócais Loch Mac nÉan idirphlé, ceardlanna agus cruinnithe le baill de phobail áitiúla, uirlisí agus faisnéis a roinnt faoi riachtanais fuinnimh sa cheantar, chomh maith le réitigh a d’fhéadfadh a bheith ann. I gcomhthéacs Thionscadal GEMINI, díreoidh sé sin ar fhuinneamh geoiteirmeach. 

Cuspóir lárnach is ea a chinntiú go mbeidh an deis ag pobail áitiúla an fhaisnéis uile atá ar fáil faoi roghanna fuinnimh gheoiteirmigh a d’fhéadfadh a bheith ann a mheas, lena n-áirítear na próisis lena mbaineann. Cinnteofar leis sin go mbeidh siad in ann cinneadh eolasach a dhéanamh maidir le hoiriúnacht dul ar aghaidh le haon tionscadal geoiteirmeach amach anseo mar chuid de thionscnamh faoi stiúir an phobail.

Go ríthábhachtach, má roghnaíonn an pobal gan aon deiseanna geoiteirmeacha a chur chun cinn, ní dhéanfar dul chun cinn orthu. Is é sin dearadh agus spiorad bunúsach cláir breithniúcháin daonlathais.

Ag deireadh phróiseas breithniúcháin an tionscadail, déanfar tuarascáil ar thorthaí deiridh na heolaíochta sóisialta (agus aon réiteach teicniúil, amhail teaschaidéil gheoiteirmeacha, líonraí teasa, srl., a phléitear leis na pobail) a tháirgeadh agus a chur ar fáil go poiblí. Má léiríonn pobail spéis i dtionscadal geoiteirmeach amach anseo a chur chun cinn, d’fhéadfadh an tuarascáil seo a bheith ina cuidiú chun maoiniú a fháil.

Céard iad aidhmeanna na bpróiseas rannpháirtíochta pobail seo?

Is é is aidhm don fhormáid rannpháirtíochta a úsáidfidh comhpháirtithe GEMINI an méid seo a leanas a dhéanamh: 

• Tuiscint a fháil ar bhraistintí maidir le fuinneamh geoiteirmeach ar leibhéal an phobail;

• Meas a léiriú ar an gcaoi ar mian le pobail a bheith rannpháirteach san aistriú fuinnimh agus tairbhe a bhaint as;

• Eolas agus acmhainn a fhorbairt chun tacú le ceannaireacht agus rannpháirtíocht an phobail san aistriú fuinnimh;

• Úsáid a bhaint as na ceachtanna agus na torthaí ó gach próiseas chun moltaí a fhorbairt d'údaráis áitiúla, don rialtas, do phleanálaithe agus do pháirtithe leasmhara ar mian leo a bheith páirteach i dtionscadail fuinnimh gheoiteirmigh ar oileán na hÉireann.

Comhpháirtithe tionscadail

Mar chuid de thionscadal leathan GEMINI, tá an obair shonrach timpeall ar cheantar Loch Mac nÉan i gcontaetha an Chabháin, Fhear Manach agus Liatroma á stiúradh ag an Meitheal Mhachnaimh neamhspleách um Ghníomhú ar Athrú Sóisialta (TASC), le tacaíocht ó Líonra Cheantar Teorann Láir na hÉireann (ICBAN) maidir le próisis rannpháirtíochta ar leith.

Is é ICBAN comhpháirtíocht trasteorann na n-údarás áitiúil, agus a oibríonn don limistéar ar a dtugtar Réigiún na Teorann Láir. Áirítear leis sin limistéir Chomhairle Ard Mhacha, Dhroichead na Banna agus Craigavon, an Chabháin, Dhún na nGall, Fhear Manach agus na hÓmaí, Liatroma, Lár Uladh, Mhuineacháin agus Shligigh.

Chomh maith le rannpháirtíocht an phobail i gceantar Loch Mac nÉan, oibreoidh TASC freisin le pobail áitiúla i mBaile Átha Cliath agus i mBéal Feirste ag láithreáin taispeántais GEMINI chun rannpháirtíocht atá sainiúil don láithreán agus faoi stiúir an phobail a fhorbairt. Roghnaíodh na suíomhanna chun ionadaíocht a dhéanamh ar raon suíomhanna idir lár na cathrach agus pháirceanna tionsclaíocha agus limistéar teorann tuaithe ina bhfuil pobail fuinnimh ghlain trasteorann nuálacha atá ann cheana.